ديوان قصايد ضيدان بن قضعان

[ابوثنين]

مرحبا بكم اخواني اخواتي في ديوان شعر ضيدان بن قضان واتمنى انه يعجبكم

المصدر: منتديات النخبه vip

[ابوثنين]

يا صغير لا تضيعني بنظرات البراءه
وانت ما تعرف مدى تأثير نظراتك بحالي

آه يالبيه يا بشويش يا هد الإضاءه
للجفول اللي من جفاله يجفلني ظلالي

فز باسم الله عليك من المبرة للإساءة
وارقد آمن في عيوني واسهر آمن في خيالي

يا صغير والذكي مثلي ليا خانه ذكاءه
ماله إلا يعشقك ويصير لعيونك شمالي

قم فديتك وانت حر من الف باءه لين ياءه
ما عطاك الا الله اسرف واستبيح ولا تبالي

سو ما يرضي غرورك وإد ما تهوى أداءه
الحشا لك بيت حاتم وانت غالي عند غالي

قم تمخطر في الحشا وانسى الكتابة والقراءة
وحل واجب شاعر ما حلته سود الليالي

وعلمه وشلون تتعدي على خط استواءه
وعلمه وشلون كيف وهل يضيعون الرجالي

وكيف يجني خلف سور الجامعة ذنب الكفاءة
ساعة نادى ابليس وقال له مالك ومالي

وأنا يشفع لك صغر سنك ونظرات البراءة
بري حالي كل مالديت يمي بري حالي

[ابوثنين]

الهنوف اللي سرت من نجد وامست في الحوية
ضيقت صدر الرياض وسافر الطائف وجاها
وانثنى غيم الحجاز لخد نجد النرجسية
يوم جاته من زعلها كنها تقصر خطاها
زعلوها وارحلت واخلت قصورالخالدية
والحقتني شرهة الزعلان واخطاني رضاها
سافرت والله ماخبر اللي يزعلها عليّه
واستباحت لله الخيرة سهر عيني وماها
ليتها يوم إستباحت دمعة العين الشقية
ماستباحت دم قلبي من خلاها في خلاها
سامح الله ظلمها وطعونها الخضر النديه
والله يسامح خناجرها ويعفو عن خطاها
عرضتني للهبايب والضماء والمهمهيه
وتركتني للزعل والشوق والكبر وغلاها
والغلا ماهو في يديها ولاهو في يديه
الغلا شي من الله واشهد ان الله عطاها
من غلاها لو توردني على حوض المنيه
كنها تسقيني الشهدالمصفا من شفاها
ومن حلاها ماتوصفها الحروف الابجديه
كيف توصف وردةٍ يبري من العله شذاها
الورود تغار منها مزهرية مزهرية
وان تباهت عذرها معها يحق لها تباها
مايشابهها شبيه ولا يحاليها حليه
جل ربٍ يوم صورها فرقها عن سواها
ل أقبلت هيجنت وان اقفت جذبت السامرية
واعذابي ان عطتني وجهها ولا قفاها
ان بدالي وجهها يسعد صباح اليوسفيه
وان غشتني نفحتٍ من ليلها يسعد مساها
درةٍ بالموت محروسة وبالبحر محمية
البحر من دونها والموت الاحمر من وراها
دونها ماغليت واسمحلي والاشداد المطيه
مرخصٍ بالقاع عمري والثريا في سماها
لايمي يبلى بحب الحضر في عيون بدوية
في ظروف مايقارن مستواه بمستواها
الله اقوى يافقير القلب ابو نفس غنيه
مالك الا الصبروالجنه لقاها من لقاها
والهوى اللي يطرح الرجال بيدين اجنبيه
علّةٍ بالجوف لاتبرى ولا يلقى دواها
والهنوف اللي نرد الثارتاخذها الحميه
شفتها بالعين في قلبي وهي تاخذ قضاها
وشفتها تشتاق تطعني بلا ذنب وخطيه
كثرماتشتاق لأعماقي وانا اشتاق إلّ دفاها
كل ماعرّقت بميسمها تحريت الخويه
وألحقت ب الميسم بميسم كذا على عماها
عاقبتني كل يوم تلحق الكيه بكيه
واتعبتني وادركتني والحقت نفسي مداها
وإن تمادت جهزوا قبري وانا بكتب وصيه
ابكتب الله لايعاقبها ويرضى لي علاها
الاعمار تلفها الايام والدنيا مديه
والسنين تلفني والنار تحرق من وطاها
علموها تلحق الباقي مدام الشمس حيه
والتغانم مابقى مني وماتطلب فْداها
لاتمادى في جفاها والرياح الموسميه
ماتقدر وقفة الاشجار وتثمن عطاها
وعلموها مابقى لي غير ادن الهاشميه
كان ترضاها علي ولاّتهون من جفاها
وانصحوها لاتحمل نفسها نفسٍ بريئه
وذكروها بالقبر لعلها والاّ عساها
وعلموها علموها لاتطول في الحويه
ديرةٍ ماهي بديرتها لواعجبها هواها

[ابوثنين]

ياعظيمه كل شين له حدود وله نهاية
لكن أنتي ما وقفتي عند حدك ياعظيمه

استلذيتي بطعناتي وآخذتيها هواية
كن مالك حربتن توجع وطعنات اليمه

آه ليتك ماتماديتي بطعنات البداية
لين صار لكل طعنه بالحشا معنى وقيمه

الله يبيحك ولكن كيف في اغرب رواية
تكتبين الحب كذبه والهوى دقه قديمه

وأنتي إلى كل مالدت عيونك في المرايه
ما لمحت ألا اليتيم إلى خذت قلبه يتيمه

واليتيمة في اليتامى مالها حق الوصاية
الوصية عودها الغض ونواياها السليمة

لكن أنتي صار لك حق الوصاية والولاية
واستبديتي وشدوا البدو واضحيتي مقيمة

ما رحلتي لين حطمتي بما فيه الكفاية
عاقل حب الجنون وصوت نارك في هشيمه

استبحتي حرمه المجنون بدراك وعناية
والتفتي له بعقلك وارتكزتي في صميمه

امتلكتي غاية لو كان ماله فيك غاية
وانتصرتي في عيونه واعترف لك بالهزيمة

من كثر ما يعشقك ماقالك بالحب رأيه
خايف الأيام لاتطلع عواقبها وخيمه

في طريقك كل ماكنه لمس درب الهداية
تاه ودروب الحياة المستقيه مستقيمة

تايه بصري ومن جابه لبيت الله تايه
عذر من غمض بعين وعينه الأخرى كريمة

فدوتك مافات من الأيام والي عاد جايه
يا بعد عمر مخا سيره معك عندي غنيمة

آنتي الفارع بقد وجد واسماء وكناية
من عشق مثلك يجوز من الهوى وشداد ريمه

ليه لا وأنتي بحسنك في ذوات الحسن آيه
لاذهب لاماس لاياقوت لاحجار كريمة

شاعر له مع هل الرايات في المر قاب راءيه
كل ما هبت هبوبك فلها قدر وحشيمه

سامحك من ألف باب ذنب ألي مالانهايه
واستباحك عن خطاه وكل طقه بتعليمه

يوم قلتي اعطني حريتي أطلق يدايه
ما ذخر عن وجهك آلا طعنتين في صميمه

[ابوثنين]

يانود هبي بالهبايب نسانيس
ويانحلة الاشعار بالشهد ذوبي

يوم القصايد نابيات ومراميس
قصيدنا عند الاصيل محسوبي

بيض الحبارى مايفرخ قرانيس
اسمع كلامي وارفع العين صوبي

والنور ياشحه بليل الحناديس
الله ولا وباب يزود ذنوبي

مره يجي في ثوب وحش البحر نيس
ومره يجي مثل الهوى والهبوبي

وضاع النقاء بين اختلاف المقاييس
وساق القدر الايام تقفل دروبي

ياتاج كسرى وانت ياعرش بلقيس
كرامتي ماساومتها جيوبي

اعف نفسي واسبر الدرب واقيس
واحاول اصحح خطاي وعيوبي

ايوالله اني من بدو درهم عيس
داري جنوب النجم وانا جنوبي

من لابة تظهر نهار المقابيس
الجد يامي درع يضفي جنوبي

لامن ضرب قرن الشياطين ببليس
مثل الرعد فزعاتهم في القلوبي

كسابة العليا كبار النواميس
لطامة العايل دهاة الحروبي

وانا احمد الله ماخذتني الهواجيس
واثق ولاهميت من عذربوبي

واللي على درب المراجل مفاليس
من بعد هذي قلت يانفس توبي

صفوا الصفوف ومقدم المرجفة هيس
وانا لحالي واركز احيان ثوبي

وان زاد جمع الدنفسة بالدنافيس
يبطون والله بالغدر ماغدوبي

ماعيش عيشة ليل خلف الكواليس
يدرون بي ولا عسى مادروبي

[ابوثنين]

هيه يالي اغراك الليل واغراك النديم
هيه يالي هزك الشوق والمسرى ضياع

وقفي بين الخطأ والصراط المستقيم
وقفي بين التراحيب وكفوف الوداع

سولفي مثل المشاريه في صوت الحشيم
واسكتي مثل الشفايف لاطاح القناع

واضحكي مثل النواويير في روضة خريم
واغربي مثل المزاجات في غرب الرفاع

وابعدي مثل المتاهات في حلم اليتيم
واقربي بين السوالف وكتفي والذراع

وانظري لي نظرة الشوق للشي القديم
واغرقي بالدمع الازرق مضاليل وساع

واصبري مثل المسافات في صبر الحليم
واسمعي صوت الهوى يوم فليت الشراع

يوم صرتي عود ريحان ورضاي النسيم
واصبري يانجمة الصبح مال الصبح داع

قد طلبت الله وانا بين زمزم والحطيم
شوفتك ياغلا سميه لاصرتي رباع

العيون تجوع تجوع والله العظيم
والعشى في عيونك السود وعيوني جياع

ان عطيتي مايرد الكريم الا الئيم
وان بخلتي قلت تكفيني والدنيا متاع

اقبلي يامثل التباشير في وجه الكريم
وارحلي مثل التعازي على موت الشجاع

[ابوثنين]

ذعذعي ياهبايب نجد لاطاب نوم السالي
وانعشيني بريح من ربى نجد للشرقيه

رحمة الله نسناسك على غترتي وعقالي
كأنه الوصل والبيد شهباء والدير محميه

مرحبا ياهبايب ياهلا وانخطر في بالي
صاحب ٍ مانساني مرحبا بابه على طاريه

يحسبني نسيته وانجلى همي وغربالي
واثرني مانسيت الي سبأ بالهوى عانيه

وكل ماهب نسناس الغلا من ديار الغالي
هب في القلب من ريح الصبا عبرة نجديه

وانجحدت الدموع من الملأ آه وعزالي
وان غشتني دموعي نعنب الحب والحنيه

والله اني صبور والبلاء ياصرايم حالي
لاتذكرت دمع ماغبا لو جحدت راعيه

واحدماجحد حبه ولا شمت العذالي
جاهر بالغلا حلوالنبأ من صفاة النيه

كان ماله سوى تاج الحلا واسم جد وخالي
وصار بلقيس وفي وادي سبأ والحشى واديه

وله جموع تنادي بالولاء من تخدته والي
وله خفوق حماه من الظماء واحرمه وسميه

ولي عيون تحدى وتخلى من كراه حالي
كأنه تقول للنوم تهبا منت كفؤ ليه

غلق الصبر والصدر امتلاء بالغلا وامالي
شتتها رياح الاقرباء والسنين معيه

علتي علتي والمبتلاء لاجفاه البالي
ماله الا حصانه لو كباه في نهار الحيّه

سامح الله خبلي لو سلا عن ربيع وصالي
وسامح الله قلبي يوم اباء يندفن في حيه

ووسامح الله هبوب بالغلا من ديار الغالي
ذعذعت لين ذعذعت الصبا عبرة نجديه

[ابوثنين]

فمان الله ياول من سكن بين الضلوع العوج
عسى دربك سفير وعسى الله مايخلني

توكل لاتوادع عسى درب الجفأ المسهوج
يصادف درب فرقى عقب هامة تلمحك عيني

سمحت من الهوى ومن القصيد ومن زراق الموج
رميت اغلا مجاديف الغرام وجيت بإيدني

ابغرق في عذابك لارحلت يصبح المنتوج
قصيد في حياتي سلوتي وإن مت يرثيني

وإذا هبن بنات الريح للذكرى بدون سروج
ابسرج مهرةالنسيان وابرحل من عنوايني

وابنسى الين اسج وابرسل الونات فوجوفوج
وابنسى دمع عيني الي ينتثر وانساك من حيني

صبور ايه والله اني ماثنيت العزم قبل ادوج
برضاني الجفا ورمال وصلك لين تسقيني

شجاع ايه والله اني ماعرفت الذل قبل اسوج
قدم رجلي على درب لبيت اهلك يدوديني

كريم ايه والله اني ماعرفت الشح قبل تروج
دموعي في عيوني ثم اشح بحسرتي فيني

احبك حسبي الله ليت مالك في سمائي بروج
ولالك في البسيطه كود شئ بينك وبيني

دخيلك لاتفلت رح بفالك واترك المرجوج
ترى انا مابقى لك الا انا ماعاد يمديني

فمان الله سق ركبك على درب السنين العوج
لكن طالبك بيت عمي لا تخليه

[ابوثنين]

حزين والله اني حزين وخاطري مكسور
لو اضحك واتظاهر بالسعاده يابحر جده

وانا يا بحر يوم اصد واخفى دمعتي معذور
لك الله يابحر صدت والصده هي الصده

اخاف تقول عني يابحر ضيدان بن منصور
في يوم من الايام ودموعه على خده

وانا مابن حي الله بشر يكشف لك المستور
انا رجل يموت ولادرت الامواج عن سده

و لاقاف ماقف ماهوب قدي لاطغى المغرور
انا قد الكلام وماقفي قدي وانا قده

و اباقف وابتسم لواني حزين وخاطري مكسور
الين الله يفرجها علينا يابحر جده

[ابوثنين]

البارحه راسي تصافق طواريه
والنوم ماله يمة العين حروه

يلعب راسي صوت صلف المشاريه
ذيب عوى يبغى عشى امه الجروه

وانا على الدنيا من الهاه للهيه
ماهمني شهرة ولا جمع ثروه

همي وغمي واحد يوم القيه
كني عليل وشوفته محو قروه

تل قلبي في الهوى من عروايه
رشاد الون ثلاثين عروه

يتله الي حامي القيض حاديه
يسقيه هبل مارعاه كروه

عشر شريده كثرها من غواليه
اقفن كما يقفى مع الجمع مروه

والي يبقى عشر وصاته من ابيه
من دونه لو يصيح الصدر ثروه

قلته وكلي ماء ينضح بما فيه
وفي العمر يوم لو يبلغ العز ذروه

واليوم هذا يا اوله وين تاليه
والنوم ماله يمة العين حروه

[ابوثنين]

يلي على وجهي قريتي كل صفحات الشقى
اقري وأنا باكتب قصيدة واشعل الساحة حريق

باقي كثر ما راح واللي راح نصف اللي بقى
وان ماوصلت لغايتي باموت في نصف الطريق

يابنت يوم امطر غلاك بقلب ضيدان وسقى
تدرين وش سبة شقاه وسبة الجرح العميق

شقاه من يمناه واسم الشيخ والنفس امحقى
والجرح منك ياأعذب العذبات يالموت الرقيق

يا بنت ما دام البدو تخلف هقاوي من هقى
وانا بدوي مني يشيل من الزمن ما لا يطيق

ابفتخر حنا بدو نعشق على وضح النقا
حنا بدو فينا الولد للقمة العليا عشيق

حنا بدو فينا الولد لو شاف موته ماأتقى
حنا بدو فينا الولد يرقا ولو ماله رفيق

حنا بدو فينا الولد لا من رقا رقا رقا
الين يوصل غايته لو كان في قمة طويق

يابنت جيتك والثمن عمري ابي ليلة لقا
يما كذا والا بلاش من الصداقة والصديق

وساعة تبسمتي وشفت الجمر والثلج اصدقا
قلت أشهد أن الموت حق وصحت لك صيحة غريق

واعتقت دمعي والزعل والحزن لرضاك أعتقا
وأغفت عيوني في عيونك ياعساها ما تفيق

وامنت باللي سخرك تقرين صفحات الشقا
واشعلت بردي في دفاك وشبت الساحة حريق

[ابوثنين]

ياوجودي كل ماهب نسناس الشمال
وجد من حده زمانه على اللي ما يبيه

وياوجودي كل مااغفيت ثم مال الظلال
لاغفت عيني ولاذقت شي مشتهيه

وجد من قفى وهو في رجا كلمة تعال
والتفت من عقب مااقفى ولحدن لد فيه

وياعذابي لادنا الليل من روس الجبال
وانتهى يوم من العمر ماعاد ارتجيه

وانتي ابعد من سما الحلم ووصالك محال
يابعد من هل دمعي ضحى الفرقا عليه

ياغناتي لاتحسبين دمعي يوم سال
ضعف والا خوف والا كذا والا كذيه

والله اني من رجال يضدون الرجال
لكن الحظ الردي ساق دمعي كلبيه

ووالله اني كل مادار حوليك الجدال
قمت كن الموت يشر على قبري يإيديه

ووالله ان قد لي وانا اصد لاجالك مجال
صدت اللي لاتضايق تذكر قبر اخيه

ومن سألني قلت مدري واذا عاد السؤال
قلتله تكفى سؤالك ترى ماهو وجيه

وش تبيني اقول عما ترى ذبحي حلال
والخطا منها علي صرت احبه واهويه

عذرها لو ماتعذر مثل واضرب مثال
واحدن مايعرف الحر الأشقر يشتويه

وان رجعنا للتواصيف لله الكمال
لا انتهى ليل المزايين جاتك تبتديه

كنها غفل مع البدو طاويها الحيال
ما يميز وصفها الا نبيه من نبيه

واهني اللي وصلها وذاق امن الزلال
رشفة مع غفلة الناس من فيها لفيه

واعزتي للي سواتي عشق ما لا يطال
ويوم طاله ضيع الحلم بين أمه و ابيه

يااول احلام الطفوله على حد الخيال
الرجا بللي حمى البيت من حملة بريه

حال دونك سيف عنتر وتاسع حول حال
باثر حول حال دونك وانا ادعي هيه هيه

هيه يللي غرك الحسن واطغاك الجمال
والله ان اموت ماشفت لاوصافك شبيه

لو يسام الحسن والتيه بجنيه وريال
مابقى في سوق غيرك لا ريال ولاجنيه

كيف اهدك للمقابيل وانتي راس مال
راس مال ومال والماال مايعطى السفيه

حافظك حفظي لعيني ورمشي لك جلال
وانتي تشحين بالما وانا شفي مويه

شايفن ظلمك وساكت وطال الليل طال
لاتركتي طعن قلبي وانا ماقلت ليه ؟

لو بقا للهيل صبرن على فوح الدلال
مابقى للقلب صبرن على شي يجيه

كنت احسب ان الغلا زال واثره لايزال
في الحشا ماكنه الا دخيل في وجيه

ساقني حبك على الموت وسنيني هزال
والظروف اقسى من الظلم للعرض النزيه

وانتي تسوقين عقلي على حد الهبال
تحسبين ان من بغى شي يقدر يشتريه

والا انا ياوجد حالي وجودن مايقال
وجد من ضحى بغاليه لرضا والديه

وياوجودي يااول العمر قبل ألبس عقال
وجد من باع آآخر العمر في رغبة ذويه

وياوجودي كل ماهب صوتش من شمال
وجد من حده زمانه على اللي مايبيه

[ابوثنين]

الدلو والميزان والقوس والحوت
ماغير برج العاج تغري وصوفه

وبرج بقلبي برج لولو وياقوت
لا يا بعد برج الحمام ورفوفه

ما يسكنه غيرك من السيف للكوت
لو ينتحي راس الولد عن كتوفه

علم وكيد بالمواثيق مثبوت
ما هو عذر اللي يفرك كفوفه

والله لا سافر لك لو ارجع بتابوت
وانا من اللي ما ربوا في مروفه

على الشقا لاع الهوى كل شفلوت
وانتي تلوعين الحشا بالطروفه

والوقت للجاحظ والايام هاروت
والقلب حاتم وانتي اغلى ضيوفه

يا مرحبا ترحيبة عقاب يا نوت
والحي يلحق لو تحده ظروفه

صوتك يكفيني عن الشرب والقوت
وشوفك غناتي والحياه مخلوفه

يااقوى من اللوعات واسخف من التوت
وابلغ من البيت الاخير وحروفه

رجل تنادينه ولا يسمع الصوت
خسارة سمعه وصوته وشوفه

ورجل يضمك بين اياديه ويموت
والله ما يلحق حياته حسوفه

[ابوثنين]

راكب اللي ما تجيبه وكالة بالبيد
ولا يجيبه بهبهاني ولا وضيحي قطر

ادهمٍ وسم الجميح على جنبه جديد
مهبل اللي يوم عرض يحسبنه شفر

جمس شكمانين ملقبينه بالوليد
من سرابه ما يغبط القصيبي والجبر

كاتبينٍ في ضمانه حديده ما يبيد
تمرةٍ قاري عليها حفيد ابو بكر

كن وجهه لا نطحته تشعشع صبح عيد
وان قفيته كنه السيل لا سال وحدر

وان عرضلك في مزاياه من عنق الفريد
وان ركبته تحسبنك على سطح القمر

دقته نغمة عبادي على سلم فريد
لا عزف الاول وجاوب على عاشر وتر

لا شتغل قالت شكامينه اركد ياحديد
والقزوز تقول للقاع روح يا فقر

كن في الشكمان الايمن صدى عبد المجيد
وكن في الشكمان الايسر صدى نايف صقر

والبلوف تقول للكهربه هل من مزيد
والسيور تقول للمروحه اين المفر

تحت كبوته من الفن طيران وعبيد
ما يغنون المسافه ولا طال السفر

كل اغانيهم على الدرب واصل ياعنيد
لين تلفي قصر شيخ على العليا شهر

سايقه من صلب ربعي وله باس شديد
ما يخاف البعد والليل والموت الحمر

من صناديد ال عرجاء هل العلم الوكيد
لابةٍ من جن تمشي على هيئة بشر

[ابوثنين]

لبا عيونك ولبا خدك وخاله
ولبا المحيا ولبا الليل والشفه

فديت عمرك بتجريحه وغرباله
لو تشربه الارض غيره والبحر جفه

هلي كما البدر غيضي كل حفاله
وسجي عن الليل لا يلهيك في صفه

وهزي على صوت رجف القلب وهباله
الطار قلبي وكف توجعه شفه

يا شفة العين قبل تجين جماله
وجيتي ولا شفت غيرك لو رفع كفه

كنك لحالك حضرتي الحفل فالصاله
ولا شفت غيرك بشر يا قمة العفه

أنتي زعيمٍ رفع للقوم فنجاله
وكلٍ تعذر شروبه ليلة الزفه

وانتي بيمنى الحلا والناس بشماله
ثقيلة العقل فيك الدم يا خفه

احيي قصيد بغيت ابكي على اطلاله
في غيرك يموت لو أحييه وازفه

وان عودت للغلا غلاك بلحاله
أنتي بكفه وباقي الناس في كفه